2Ch 7 | TpiKJPB | STEP | ¶ Nau taim Solomon i bin mekim wanpela pinis long beten, paia i kam daun long heven, na kaikai dispela ofa i kuk olgeta na ol sakrifais olgeta. Na glori bilong BIKPELA i pulimapim dispela haus.

2 Chronicles 7

1 ¶ Nau taim Solomon i bin mekim wanpela pinis long beten, paia i kam daun long heven, na kaikai dispela ofa i kuk olgeta na ol sakrifais olgeta. Na glori bilong BIKPELA i pulimapim dispela haus. 2 Na ol pris i no inap long go insait long haus bilong BIKPELA, bilong wanem, glori bilong BIKPELA i bin pulimapim haus bilong BIKPELA. 3 Na taim olgeta pikinini bilong Isrel i luksave long paia i kam daun olsem wanem, na glori bilong BIKPELA antap long dispela haus, ol i lindaunim ol yet wantaim ol pes bilong ol i go long graun antap long dispela rot ston, na lotu, na litimapim BIKPELA, i spik, Long wanem, Em i gutpela. Long wanem, sori bilong Em i stap strong yet oltaim oltaim. 4 Nau king na olgeta manmeri i ofaim ol sakrifais long ai bilong BIKPELA. 5 Na king Solomon i ofaim wanpela sakrifais bilong 22,000 bulmakau man, na 120,000 sipsip. Olsem tasol king na olgeta manmeri i makim haus bilong God. 6 Na ol pris i mekim wok long ol wok bilong ol. Ol lain Livai tu wantaim ol samting bilong wokim musik bilong BIKPELA, dispela king Devit i bin wokim bilong litimapim BIKPELA, bilong wanem, sori bilong Em i stap strong yet oltaim oltaim, taim Devit i litimapim Em long wok bilong ol. Na ol pris i winim ol biugel long ai bilong ol, na olgeta Isrel i sanap. 7 Na moa tu Solomon i mekim i kamap holi namel stret bilong dispela ples op i stap long ai bilong haus bilong BIKPELA. Long wanem, em i ofaim ol ofa i kuk olgeta, na gris bilong ol ofa bilong bel isi, bilong wanem, dispela alta bras Solomon i bin wokim em i no inap long kisim ol ofa i kuk olgeta, na ol ofa bilong kaikai, na gris. 8 Na tu long dispela taim stret Solomon i holimpas dispela bikpela kaikai sevenpela de, na olgeta Isrel wantaim em, wanpela bikpela bung bilong ol manmeri tru, i stat long hap bilong go insait bilong Hemat i go inap long riva bilong Isip. 9 Na long namba et de ol i wokim wanpela bung holi. Long wanem, ol i holimpas dispela taim makim bilong alta sevenpela de, na dispela bikpela kaikai sevenpela de. 10 Na long namba 23 de bilong namba seven mun em i salim ol manmeri i go long ol haus sel bilong ol, wantaim amamas na amamas insait long bel long dispela gutpela pasin long BIKPELA i bin soim long Devit, na long Solomon, na long Isrel, lain manmeri bilong Em. 11 Olsem tasol Solomon i pinisim haus bilong BIKPELA, na haus bilong king. Na olgeta samting i kam insait long bel bilong Solomon long wokim long haus bilong BIKPELA, na long haus bilong em yet, em i wokim i kamap gutpela. 12 ¶ Na BIKPELA i kamap ples klia long Solomon long nait, na tokim em, Mi bin harim prea bilong yu, na Mi bin makim dispela ples long Mi yet bilong wanpela haus bilong sakrifais. 13 Sapos Mi pasim heven inap long ren i no stap, o sapos Mi tok strong long ol lokas bilong kaikai dispela hap olgeta, o sapos Mi salim sik nogut namel long lain manmeri bilong Mi, 14 Sapos lain manmeri bilong Mi, husat ol i kolim long nem bilong Mi, bai daunim ol yet, na beten, na painim pes bilong Mi, na tanim na lusim ol rot nogut bilong ol, orait bai Mi harim long heven, na bai Mi lusim sin bilong ol, na Mi bai oraitim hap bilong ol. 15 Nau ol ai bilong Mi bai stap op, na ol ia bilong Mi bai stap op long dispela prea ol i mekim long dispela ples. 16 Long wanem, nau Mi bin makim na mekim i kamap holi dispela haus, inap long nem bilong Mi i ken stap long dispela hap oltaim oltaim. Na ol ai bilong Mi na bel bilong Mi bai stap long dispela hap oltaim. 17 Na long sait bilong yu, sapos yu bai wokabaut long ai bilong Mi, olsem Devit, papa bilong yu, i bin wokabaut, na mekim bilong bihainim olgeta samting Mi bin tok strong long yu, na yu bai lukluk gut long ol lo Mi bin raitim na ol kot bilong Mi, 18 Orait bai Mi strongim sia king bilong kingdom bilong yu, bilong bihainim wankain olsem Mi bin wokim kontrak wantaim Devit, papa bilong yu, i spik, Bai i no inap fel long yu long gat wanpela man bilong stap hetman long Isrel. 19 Tasol sapos yupela tanim na lusim, na givim baksait long ol lo Mi raitim na ol tok strong bilong Mi, dispela Mi bin putim long ai bilong yupela, na yupela bai go na bihainim ol arapela god, na lotuim ol, 20 Orait bai Mi pulim ol i kam antap, long ol rop daunbilo, ausait long hap bilong Mi, dispela Mi bin givim long ol. Na dispela haus, dispela Mi bin mekim i kamap holi long nem bilong Mi, bai Mi tromoi ausait long hap ai bilong Mi i lukim, na Mi bai mekim dispela long stap wanpela provep na wanpela hap tok namel long olgeta kantri. 21 Na dispela haus, dispela i stap antap, bai stap wanpela samting bilong mekim ol man i kirap nogut long olgeta wan wan husat i wokabaut klostu long en, inap long em bai tok, Bilong wanem BIKPELA i bin mekim olsem long dispela hap, na long dispela haus? 22 Na dispela ol bai bekim tok, Bilong wanem, ol i givim baksait long God BIKPELA bilong ol tumbuna papa bilong ol, husat i bringim ol i kam ausait, ausait long hap bilong Isip, na holimpas ol arapela god, na lotuim ol, na bihainim ol. Olsem na Em i bin bringim olgeta dispela samting nogut antap long ol.